Riyaziyyat kinolarda

Bu məqalədə, riyaziyyat və riyaziyyatçılar barədə olan bir neçə film haqqında yazmaq istərdim. Mövzusu “başsındıran” riyaziyyat suallarına ən yaxın olan filmlərdən biri,  “Fermanın otağı” filmidir.Filmdə, bir neçə riyaziyyatçı xüsusi bir otağa dəvət olunurlar və orada onlara sms vasitəsilə məntiq və riyaziyyatdan suallar verilir.

Riyaziyyatçılar hansısa suala səhv cavab verdiklərində, otağın bütün divarları qabağa gəlir və və beləcə otaq getdikcə daha da darlaşır. Bütün bunları görən riyaziyyatçılar təşvişə düşür və otağa niyə dəvət olunduqlarını anlamağa və eyni zamanda suallara doğru cavab verib sağ qalmağa çalışırlar . Riyaziyyatçılar otaqdan sağ çıxa biləcəklərmi? Bunu filmə baxıb öyrənə bilərsiniz. 

Digər çox maraqlı film isə, məhşur riyaziyyatçı-iqtisadçı, Con Nəş haqqında olan Mükəmməl Dərrakə (A Beautiful Mind) filmidir. Film, riyaziyyatçı Con Nəşin tələbəlik illərindən ahıl vaxtına qədər olan həyat yolunu, 2 saat ərzində izləyicilərə çatdırmağa çalışır. Con, riyaziyyatda çox yaxşı olsa da, insanlarla ünsiyyət qurmaqda, məğlub olmaqda o qədər də uğurlu deyil. Formal təhsilin mənasız olduğunu düşünən Con, qeyri standard fikirləşərək, təmamilə yeni bir nəzəriyyə kəşf etməyə can atır və sonda buna nail ola bilir. O, oyunlar nəzəriyyəsinə “Nəş tarazlığı” ideyasını formal olaraq təqdim edir. Nəş tarazlığının optimal olduğunu, o yalnız ikicə səhifədə sübut edir. Onun məqaləsini internetdən axtarıb tapa bilərsiniz. Nəşin bu iki səhifəlik ideyası sonradan riyaziyyat, iqtisadiyyat, biologiya və digər istiqamətlərdə öz tətbiqini tapır və ona Nobel mükafatı qazandırır. Con Nəşin özü filmdən razı qalsa da, Hollivudun onun həyatının bəzi aspektlərini şişirtdiyini və ya uydurduğunu qeyd edib. Bütün bunlara rəğmən film çox maraqlı alınıb.

Digər maraqlı bir film isə “21” filmidir. Bu filmdə, bir neçə universitet tələbəsi, öz riyaziyyat professorlarının himayəsi altında, hər həftəsonu Las Veqas qumarxanalarına pul qazanmaq dalıyca yollanırlar. Onlar öz riyazi biliklərindən və iti yaddaşlarından istifadə edərək, qumarxanadakı BLACKJACK” kart oyununda 100 minlərlə dollar pul qazanırlar. İlk zamanlar hər şey planlaşdırıldığı kimi getsə də, sonradan tələbələr arasındakı şəxsi münasibətlər və onların emosiyaları işləri korlayır. Sonda nə baş verir? Bunu filmə baxıb öyrənə bilərsiniz.

Mənbə:www.riyazitest.com